Franza il portale di Stefanaconi

 

"Canzuni d'amuri e di sdegnu"

 

Suspiri d'amuri...
   
Brutta sgobbata, faccitosta e trista,
di mia volivi chjamata donna onesta.
Jeu u sacciu cu ti tocca e cu ti tasta,
e cui subba di tia faci festa!
Oh rosa chi nescisti a la rosara,
eri buttuni e jeu ti pretendìa.
Mo chi tu cuminciasti a spompinari,
fai l'amuri cu n'atru e no cu mmia.

Capiji rizzi e capiji ntrizzati,

guarda chi bella chjoma chi teniti.

Véninu i festi e vi li pettinati

a terra trema quandu li sciunditi.

Sona la santa missa e vui nci jati

la genti faci largu e vui trasiti.

A chiju bancu chi vi nginocchjati

l'adduri di garompula dassati.

Finisci a santa missa e vi ndi jati,

e a genti, senza cori la dassati.

Vinni mu cantu ca nci fu mandatu

di n'amicu di cori agguali a mmia

iju non potti veniri ca è malatu,

seppi ca sugni fidili e mandau a mia!

Mi dissi mu ti cantu appassiunatu

come nci cantu a Nunziateia mia!

Non ti cridiri ca daveru è malatu

ca è c'avanti chi canta cu mmia!

Affacciati oh bella mu ti viju,

mu sazziu stu cori e mi ndi vaju!
Bruttu lu survu
e brutta la survara,
tu si cchiu' brutta di la malanova.
Va stricati a nu culu di coddara,
e pe sett'anni non nesciri fora.

Vitti a fortuna mia a menzu mari,

e jeu nci dissi: fortuna chi hai?

Chi hai fortuna chi ciangi pe mmia?

Ieu cangiu ca ti viju lacrimari;

lacrimari ti viju e no borria!

O facci di na buffa untata d'ogghiu

tu vai dicendu ca jeu moru pe ttia

vattindi a mari e stricati a nu scogghiu

fattilla na lavata di lissia

e poi mi mandi a diri si ti vogghiu?

Vogghiu na malapasca mu ti pigghia.

Oh rosa russa culurata e bella

jeu fu lu primu amuri chi t'amai

t'amai quandu eri piccula e zunzella

quandu bella di tia mi nnamurai;

e mo' criscisti e ti facisti bella

e mu ti guardu no mi sazziu mai.

Bruttu, bruttazzu si fattu di terra

nci mbischi milli morbi a cu ti parra!

O bruttu lignu stortu di ficara

ci ndi mentisti difetti a la bandera!

Apposta passu di c'avanti ogn'ura

ca t'aiu nta lu cori e nta la menti:

teni a pedata mia, teninci cura

ca li palori toi li tegnu a menti!

Facci di nu carduni amariusu

chi sempi subba o stomacu mi vai...

vattindi nta nu cantu e statti chiusu

sempi lordu sì e nettu mai!

Feti comu l'ogghiu di limusa

feti la ruga e la casa chi stai!

 Turigghju profumatu di stu cori,
ti vogghjiu tantu beni e non nci cridi.
E pregu tutti i santi di l'artaru,
parola mia d'onuri non tornu cchiu'.
Si no ndi vidimu aguri e bon viaggiu,
mangiamu e mbivimu c'a vita è nu passaggiu.

Donna dimmi chi hai, dimmi chi boi?

Cu stu parrari a botti chi mi fai.

Vaju a parrari all'atri e tu non boi

vaju a parrari a ttia e tindi vai

Cantu e non aju lena di cantari

perdivi lu sigillu di lu cori!

U perdivi e no potti cchjiù trovari

no sacciu quali amanti si lu godi!
   
  Gruppo di lavoro:  Mimma Lococo, Nazzareno Foti (Australia),

Dominic Foti (Canada), G. B. Bartalotta, Francesca Matina

Ultimo aggiornamento il 13/01/2016