GARIBARDI TRASIU NTA ROMA

di Pino Lo Preiato

Tardu na notti nci fu na gran gridata,

nu malu sonnu ebbi Micheleju;

nta cammara scappau a na volata

adduvi i Soi dormenu a nu muzzeju.

Vitti u patri chi a mamma cavarcava,

e i dui jenu a passu di galoppu;

u cotraru ncazzunutu li guardava,

l’amanti s’accorgiru nta nu schjoppu.

Cacanudi e spanticati si levaru,

Micheleju c’avia cinc’anni quasi sbeniu

mu i vidi tutt’a nuda, povaru amaru:

“Chi jocu curiusu!” poi ammutiu.

Quandu a palora nci tornau o cotraru

nci dumandau a pàisa: “Chi hai davanti?”

“Jè Garibardi”, dissi “e a mia m’è caru”;

u cotraru s’accuntentau e jiu avanti.

A stessa dumanda a mammasa nci fici,

tuttu curiusu u vidi chija “hjalona”,

e nci vozaru i carici mu nciu dici:

“Figghjiu meu chista jesti Roma”.

Nu jornu d’estati facia nu bruttu caddu

e u cotraru capitau nta stanza i lettu,

vitti a mamma e o patri, fora gabbu,

stringiuti, stritti stritti, pettu cu pettu.

Cuntentu Micheleju jiu subba o barcuni

e forti assai gridau mangiandu friscotta:

“Garibardi trasiu nta Roma a curramuni

e i mei, cuntenti, suspirarunu a na botta.”