|
U zi Peppi a pitta
OH STEFANACUNI!
GIUSEPPE BARBIERI
Povaru pajseju sbenturatu,
chi malapasca chi ti vinni a ttia…
Tutti vannu currendu a perdihjiatu,
pe la disgrazzija di la gallaria!
E patri di famigghia si ‘mpittaru,
‘nta li visciari nigri di la terra.
Oh, quantu è tristi ‘stu carvariju amaru,
lu progressu portau ‘na ‘terna guerra!
E jè guerra di lagrimi e suspiri,
lu pani amaru chi ndi fatigami,
ìnta sta Calabrija mia, china d’amuri,
cchiù fatigamu e cchiù nd’arredi jamu!
NINNA NANNA DI NOTALI
GIUSEPPE BARBIERI
Jeu no’ sacciu pecchi chistu Notali
Portau lu suli e pari primavera,
lu Bambinu cacciau li tempi mali
e lu caddu squagghiau chija nivera!
Veni, Bombinu meu, veni a dormiri,
quantu si’ bellu di visu e di cori,
‘nta li me vrazza ti vogghiu teniri,
veni si nno’ ‘sta vita di ndi mori!
Porta la paci ‘nta ‘stu mundu ‘mpanu,
porta lu bbeni chi tu sulu hai,
jeu no’ mi stancu mai pemmu ti chiamu,
pecchi mi trovau ‘nta mari di guai!
Veni lu Papa duvi tu si ‘natu,
Pe’ cercari di tia luci ed amuri,
lu mundu è tuttu chinu di peccatu,
si’ statu sulu tu lu Redenturi!
E sarva chista terra chi di mali
ti fici tantu funu a lu moriri,
sarvale ‘nta ‘sti festi di Notali,
‘nta li me’ vrazza veninci a dormiri!
A LU VOSCHETTU DI RUGGERI
GIUSEPPE BARBIERI
Jè bellu lu voschetu di Ruggeri
Duvi jeu sempi ivi a caccijari.
M’aspettava a lu friscu lu me’ bbeni
Ad una funtaneja d’acqui chiari!
E ‘ntornu, ‘ntornu di rosi, vijoli,
‘menta, capijuvenanru ‘nadduri
‘nta lu cori trasia duci e carnali
‘nzemi a li vasi di l’Amatu amari!...
E quanti rusignoli ‘nta lu voscu
‘ndi cantavanu a festa ‘na canzuni,
lu mejaru friscava a cchiù no’ pozzu
pemmu nd’abbisa ca venia perzuni,
‘Nta li me’ vrazza cadisti sbenuta
E suspiravi comu ‘na palumba,
e li to’ trizzi mentri accarizzava,
la ggenti nd’arrivau a la funtana!
Scornusa rimasti e puru jeu,
ma restammu abbrazzati tutti ‘i dui,
la facci cu’ la faci nd’ammucciammu,
la genti vinni all’acqua e si ndi ju.
E quando lu voschettu di Ruggeri
Jeu m’arricordu, a lu me’ primu Amuri
Penzu, a’lu tempu bellu chi no’ torna,
chi si portau la mmegghiu gioventu!
|
|
|